شعب مصر مات وعفن

محمد غيث - مصر المماليك الجدد

ألف رحمة ونور عليك ياشعب مات من زمان…

ياشعب حفر قبره بأيديه وهال التراب عليه….

واختار يموت موتة جبان ……

ياشعب اتحرق وغرق واتسرق…..

وجاع وصاع وضاع…..

ومرض واتهلك…..

لاجل حفنة من غيلان…..

معقول ياشعب مصري إن حفنة من لصوص….

تسرق ضمير….

تمانين مليون جبان….

معقول نركب قرون ….نركب ديول… زي البهايم والحمير ويا الخيول….

ونعيش عبيد زي الحريم زي الجواري….

في الحرملك أو زي تنابلة السلطان ….

ياشعب تاهت خطوته وحظوته وسطوته…. وغابت عنه ضحكته ….

وسرقوا اللقمة ومعاها البسمة من شفته ….

وحتي الأمان …..

ياشعب راضي ليه بالمهانة وليه الذل عنوانك والأستكانة….

ياشعبي عيش أنسان….

أو موت أنسان…

قوم ياشعب وشق القبر… وانفض ترابه من عليك… قوم ولملم خيوط الفجر من تاني جوه في عينيك … قوم ودوس برجليك … علي سوس عضامك والديدان….

أصرخ وقول لكل الدنيا من تاني أنا المصري….

أنا نيل وهرم …أنا الراعي مش الغنم …أنا رافض للصنم… أنا رسالة عيسي ومحمد ….

أنا أنجيل وقرآن ….

أنا أنسان….أنا أنسان ….

[ندعوك للتسجيل في المنتدى أو التعريف بنفسك لمعاينة هذه الصورة]